المساعد الشخصي الرقمي

مشاهدة النسخة كاملة : ذكرياتي مع الحبيب الراحل ..


احساس الدوحة
10-06-2007, 01:41 AM
كلما جلست مع نفسي

تنتابني موجة حنين جارف ..

لضمة وحضن ابي الدافئ

رحل عن دنياي ..

رحل دون ان يعطيني فرصة ان احكي له

قصتي مع زوجي وابني ..

رحل دون عودة .. وهذه هي سنة الحياة ..

بعض الذكريات سأكتبها واتمنى ان تنال استحسانكم ..


http://www.9m.com/upload/9-06-2007/0.86201181386937.jpg

* كنت صغيرة ما كملت السبع سنوات

اركض وعجايفي تطير في الهوا

بكل براءة ادور في الفريج

كنت كل مره اطلع فيها ارد وانا متلهفه

لحضن حبيبي ابوي الحنون ..

كان يقعد في الميلس مع ربعه الشياب

وما يمنعني انسدح على ريوله و في وسطهم

كانت امي تهاوشه وتقول .. عيب البنت كبرت

كان يقول .. دامها بحضني لا تخافين عليها


http://www.9m.com/upload/9-06-2007/0.1264101181387684.jpg

* يوم كنت بالصف الاول

كنت اسمع وايد عن الشيعه ونظره السنة لهم

واشلون معتقداتهم غريبه وعجيبه

والتي تخالفنا احنا يالسنّة ..

مرة من المرات كنت في المدرسه

دخلت الادارية علينا في الصف وسألتنا ..

يا طالبات .. عندنا مسيحيه في الصف ؟؟

وبعفويه الاطفال .. قمت وقلت لها

ايوه ابله صديقتي منى ... ( ابنة جارنا علي )

استغربت منى من كلامي وفتحت حلجها وقالت :

لا والله احنا مسلمين يا ابله

طبعا المدرسة عرفت اني ملقوفه .. طلعت .. وما علقت ..

مر اليوم الدراسي عادي

ولكن في عصر هاليوم

طقوا باب الحوش .. كان اركض افتح

الا ابو منى في وجهي ..

قالي : نادي ابوج ..

واول ما ابوي وصل عند باب الحوش

قال له ابو منى : شتقول عنا جدام بنتك عشان تقول عنا مسيحيين ؟

اووووووه ...

في هاليوم شفت بعيون ابوي نظره

عمري ما انساها لين ما اموت ...

وهذي المره الوحيده اللي اتذكر ان ابوي ضربني

وقلت له :

خلاص يبه مب قايله عنها مسيحيه مرة ثانية

بس تدرون صج انا ملقوفه

والا ايش دخلني اذا هي مسيحيه والا مسلمه والا شيعيه ..؟؟


http://www.9m.com/upload/9-06-2007/0.8769901181387955.jpg


* في احد الاعياد وكان عمري يومها ثمان سنوات

اخذني ابي لبيت واحد من جماعتنا وقال لي

هناك كل الشيبان

والعيديه اللي بتحصلينها اشتري بها اللي تبين

ورحت معاه واتذكر ان يومها مافي ولا بنت في الميلس

الا انا لازقه بأبوي ..

وحصلت يومها عيديه 300 ريال

وقبل عشرين سنة هالمبلغ كان خيالي لطفله في العيد

رجعت البيت فرحانه بالعيديه

ولكن..

امي الله يسامحها ودتني سوق الذهب

واشترت لي عقد ما انسى شكله عباره عن قطعة ذهبيه

نقشت عليه اسمي

ظل معاي لين ما وصلت الثانويه ...

ولين اليوم اتذكر ذاك العيد وحرماني من العيديه

لاني كنت اتمنى اشتري عروسه شفتها بالدكان

كانت في طولي تقريبا

وكانت غاليه ثمنها فوق الـ مئة ريال ..

http://www.9m.com/upload/9-06-2007/0.4347401181388246.jpg


* يوم كانت الكهربا تنقطع عن بيتنا

كان ابوي فديته ما يحبنا نقعد في الحر

وياخذنا لفة بشوارع الدوحة

ونشرب عصير وما انسى عصير الموز

في القلاص الكبير اللي عليه دواير

خبركم يومها مافي قلاصات بلاستيك وحركات

ويرجعنا البيت ويشوف الكهربا ما وصلت لين الحين

فيرجع وياخذنا في سيارته ولفة يديده عالكورنيش ..

فديت حنانك يا يبه ...

::

::


( انتظروني مع الجزء الثاني من ذكرياتي ... )

زهرةالصبار
10-06-2007, 02:07 AM
:cry: :cry: :cry: :cry: :cry:

الله يرحم آبائنا وجميع موتى المسلمين

هم السابقون ونحن اللاحقون

احساس الدوحة
10-06-2007, 09:50 AM
اختي زهره الصبار

ويرحم موتاكي يالغاليه

تسلمين عالمرور

الشقردي
10-06-2007, 10:04 AM
اما سالفة المسيحية

لوووووووووووووووووووووول

توني اعرف انج ملقوفة

احساس الدوحة
10-06-2007, 07:07 PM
اخوي الشقردي

والله كنت صغيره

ولكن يوم اتذكر

اقول في نفسي اشدخلج ههه

تسلم عالمرور

وانتظر مفاجأة الجزء الثاني

مع ذكرياتي مع الحبيب الراحل

بريق العيون
10-06-2007, 10:50 PM
الله يرحم جميع موتى المسلمين :f63:

يعطيج العافية يالغلا .!!


وبانتظآر مفاجأة الجزء الثاني :happy:

احساس الدوحة
11-06-2007, 02:46 PM
اختي بريق العيون

تسلمين يالغاليه

وانتظريني ...

الوعــ نور ـــد
18-06-2007, 08:05 AM
فعلا ايام لاتنسى ..

بس حلوه سالفة المسيحيه :)

ووين الجزء الثاني

ياسمين قطر
18-06-2007, 10:36 AM
شكلج مطلعة فضايح الفريج

احساس الدوحة
20-06-2007, 12:23 AM
اختي نور الوعد

قريبا انتظري الجزء الثاني

لك ارق تحيه يالغلا

احساس الدوحة
20-06-2007, 12:24 AM
اختي ياسمين

هاذي براءه الطفوله

نتذكرها اليوم ونضحك

لك ارق تحيه يالغلا

احساس الدوحة
20-06-2007, 03:14 PM
الجزء الثاني ..

http://www.majaless.com/up/uploads/84eb789eea.jpg

*عندما انهيت الثانويه فضلت ان اعمل ولم اكمل دراستي

وجاء احد العرسان يطلب يدي

كانت امي متسلطه وشديده وترفض النظره الشرعيه للمتقدم

فكان ابي يقول للمعرس :

اذا تبي تشوفها هي تشتغل في ( .... )

وشوفها ولو عجبتك تعال اخطبها ..

وبالفعل جاء في ثاني يوم الى مقر عملي

طبعا ابوي مخبرني قبلها وكشخت يومها ههههه

هالموقف يدل على مدى تفهم ابي لنفسياتنا

وتقديره للظروف

كم انت حنون يا ابي ..

http://www.majaless.com/up/uploads/3266d6374c.gif


* مرة من المرات قررت ان اسافر مع ابي الى دبي

في الطيارة جاءت مضيفه جميله

وطلبت منا ان نربط حزام الامان

قلت لأبي : تعال اسكر لك الحزام يا يبه

قال لي : لا خليها هي تسكره انتي ما تعرفين

خليته براحته .. امي مب ويانا وخليته يستانس يومها هههه

ونادى المضيفه الجميله وقالها ماعرف اسكره تعالي

وانحنت تلك الحسناء وسكرت الحزام

ومن يومها كل ما نسافر كان يسألني

وينها الحلوه ؟؟


http://www.majaless.com/up/uploads/449714b82a.jpg


* عندما كبر ابي وتعب واصابه السكر كان من الضروري

اخذ حقن الانسولين

وكنت اسكن انا وهو وامي والخادمه فقط

فالجميع تزوج وانا اخر العنقود ..

فكان يجب علي ان اتعلم

وتعلمت واتذكر يومها الممرضه تدربني بحقن برتقاله

وتعلمني كيف اقوي قلبي واضرب الابره

ولكن فرق بين يد ابي والبرتقاله

فقد كانت يده عباره عن بقايا جلد اكلتها السنين

كنت اقوم يوميا من نومي كي اضربه تلك الابره

وتخيلوا مأساة فتاة سهرانه لين الفجر

واقوم الساعه ست الصبح علشان اعطيه الابره

وكنت اتذمر احيانا .. الله يسامحني

واحيانا كان يفقد الامل اني اقوم كان يفطر بدون الابرة

اليوم اتذكر واندم واقول ( سامحني يا يبه لو قصرت )..

كان غرامه انه يفطر البسكوت المالح TUC


http://www.majaless.com/up/uploads/8a48392255.jpg


* يوم خطبني بو راشد كنت اقوله اشلون اخلي ابوي

من بيعطيه ابر السكري .؟؟

كلمت الطبيب ورفض يغير ابر الانسولين الى اقراص

لاصابته في الكبد والاقراص بتأثر عليه

قرر الطبيب ان الخدامه تتعلم ..

و في يوم احتفالي بليلة الحنة قبل عرسي بيوم

وانا رايحه الصالون

رحت اسلم على ابوي قبل ما اطلع

وقالي يومها : طبعا الليله بترجعين ؟؟

قلت له: ايوه يبه اليوم الحنه

اذكر ليلتها كنت حاطه الحنه بيدي ورجلي وكان وقت الابره

فكانت صديقتي مريم الله يجزيها خير

تعطي امها هي بعد كل يوم ابر الانسولين

وضربت ابوي يومها ابره الانسولين

http://www.majaless.com/up/uploads/16eeb67028.png


* في يوم العرس وانا طالعه للفندق

سلمت على ابوي .. ضمني ضمة قويه وقالي ..

ما اوصيج على ريلج ولا تقطعينا والله يوفقج

وبكينا انا وهو ..

لاني كنت متعلقه فيه وايد وكان هو متعود علي ..

طول الطريق وانا رايحه الفندق افكر واقول

ليش انا انانيه وتركت ابوي ؟؟

من راح يعطيه الابره ؟؟

من راح يدلك رجوله ؟؟

من راح يساعده في لبس ملابسه ؟؟

من راح يونسه في وحدته ؟؟

كانت هوايته اني اجيب الملقط واقطع الشعر اللي باذنه

وكان غرامه اني اخفف له شنبه وارتبه

وكانت متعته اني احك ظهره

وكانت امنيته يشوفني عروس

كانت هاذي كلمته دايما

( ابي ازوجج واتطمن عليج وبعدين اموت)


http://www.majaless.com/up/uploads/7ead2666fc.bmp


* ثاني يوم من العرس كان الغدا في بيت ابوي

وكانت صباحيتي

لبست وتعدلت ورحت لبيت ابوي

كان ابوي مشغول بالمعازيم والمعرس اللي هو زوجي

وكنت انا مشغوله مع امي واخواتي

والعصر قعدت مع ابوي شوي

وكان عرسنا بالشتا وما انسى يوم شفته

لابس جاكيت بني فوق الثوب

وحاط رجل على رجل

ويقول تعالي اجلسي جنبي

وقعدت

فقام يوصف لي حالته ليله عرسي

قالي والله بكيت بكا عمري ما بكيته

ونعالج ( الله يعزكم ) اخذته وبسته

وحسيت البيت مظلم من غيرج

بس المهم ابي اشوفج سعيده معاه ان شاء الله

ضميته وبكيت

وكانت اختي بكاميرا الفيديو تصورنا

وما زلت احتفظ بشريط فيديو لأبي في ثاني يوم من زفافي

وهو يقول ( انتي حبيبتي انا شاسوي من غيرج )

::

::


( في الجزء الثالث والاخير .. كيف مات ابي بعد زفافي بأيام )

اتمنى تواصلكم وتفاعلكم ...

الوعــ نور ـــد
21-06-2007, 06:17 AM
بصراحه ها الجزء احزني وايد ..

صعب لما حد عزيز عليج وقريب منج يصيده السكر ويحتاج من يعتني فيه دوم ..

واما امج عجيبببه بتسلطها ..وزين انه ابوج كان متفهم وارف اهمية النظرة الشرعية ..


ناطره الجزء الثالث بفارغ الصبر

دروب الحزن
21-06-2007, 07:36 AM
الله يسامحج يا أحساس والله بكيت واااااااايد تثرت بحبج لبوبج وحبه لج ..


الله يرحمه يارب ويجعل مثواه الجنه ..


سرد رائع وقصه مؤثره ننتظر الجزء الثالث يالغلا ..

احساس الدوحة
21-06-2007, 11:00 AM
اختي نور الوعد

معروف ان الاب دايما يكون حنون

على البنت اكثر من الام

لان الام تكون حريصه اكثر على البنت

تسلمين يالغاليه

وانتظري الجزء الاخير

واشلون مات ابوي وانا مازلت عروس

تسلمين يالغلا

احساس الدوحة
21-06-2007, 11:01 AM
اختي دروب الحزن

وعسى ما تبكين على غالي

انتظري الجزء الثالث والاخير

ولك مني ارق تحيه يالغلا

احساس الدوحة
26-06-2007, 04:40 PM
الجزء الثالث والاخير

http://www.majaless.com/up/uploads/1f07643bbb.jpg

في اليوم الثالث من عرسي

وانا في الفندق مع زوجي

فقد كان مخططنا نقعد في الفندق ثلاث ايام

جاني اتصال من اختي ان ابوي تعبان

ولازم ياخذونه للمستشفى

قلت لها انتظريني ..

فقالت : مافي وقت

ترجيتها ما يركبون ابوي الاسعاف لانه يتشائم

ولكن اختي ما عرفت تتصرف

لاني انا في السابق ابدل ملابسه واحضر السايق

علشان يساعدني ونشيله في السياره

وكان ذلك صعب علي

ولكن كنت احترم رغبته

في عدم ركوب سياره اسعاف


http://www.majaless.com/up/uploads/9206626587.jpg

طلبت من زوجي ان يأخذني بسرعه الى البيت

وعندما وصلت قالت لي امي

اخوك اخذ ابوك في الاسعاف المستشفى

بكيت بحرقة لاني كنت احترم رغبته

وعمري ما فكرت اخليه يركب الاسعاف

ويوم تزوجت ركبوه الاسعاف ...



http://www.majaless.com/up/uploads/f99c097331.jpg


كان دائما يردد هالجمله

( اذا ركبت الاسعاف يعني ماراح ارد البيت )

وكنت خايفه يتحقق كلامه ..

وكنت اسوي المستحيل بس علشان ما يركب الاسعاف

اذكر مره السايق كان مسافر

واضطريت اوقف تاكسي ( البرتقالي مب كروه )

والبتاني سايق التاكسي الله يجزيه خير

ساعدني وشلناه في التاكسي

http://www.majaless.com/up/uploads/ffdaa43134.jpg


ركضت رحت المستشفى

ولقيته نايم بالعناية المركزة

واجهزة كثيرة عليه وهو مب واعي

بقى في العنايه المركزه اربعة ايام

ازوره يوميا واكلمه وهو ما يسمعني

بس اسمع صوت اجهزة القلب والضغط

في اليوم الخامس فتح عينه

وابتسم لي ابتسامه لن انساها ابدا

نزلت وبسته ..

وانبوب التنفس طالع من حلجه

من فرحتي ان ابوي فتح عيونه

حتى شفايفه بستهم ..

سهرت معاه وهو مربوط اليدين

علشان ما يطلع الاجهزه من خشمه ويده وحلجه

سهرت معاه وقريت قران في اذنه

وهو مغمض عيونه ومبتسم

و لين ما تعبت

تقريبا الساعه 11 بالليل

قلت لزوجي خلنا نروح البيت لاني تعبانه

من الصبح وانا واقفه وبنرجع له الصبح

ترجاني زوجي نبقى معاه

قلت له والله تعبانه ومب قادره اسهر اكثر

قالي باخذج البيت وبارجع له شكل ابوج الليله تعبان

قلت له خلنا الصبح بنروح له انا وياك ..


http://www.majaless.com/up/uploads/ffdaa43134.jpg


رحت البيت ومن التعب نمت على طول

رن جرس التليفون الساعه الثانيه بعد منتصف الليل

قمت متخرعه وزوجي قاعد ينتظرني اشيل السماعه

ولقيتها اختي تبكي وتقول ابوي تعبان تعالوا بسرعه

ركضت ولا ادري شنو لبست

حتى زوجي في الطريق يضحك علي

كنت لابسه الله يعزكم نعال الحمام

لكن الحاله اللي انا فيها ما كنت مهتمه انا شنو لابسه

وصلت طابق العنايه المركزه

وشفت اختي عالارض تبكي وزوجها حاضنها يهديها

قلت اكيد السالفه كايده

ركضت صوبها الا قالت .. ابونا مات

صرت مثل المينونه

ركضت غرفته ..


http://www.majaless.com/up/uploads/4841b866e7.jpg


لأول مرة في حياتي اشوف ميت و بالكفن ابيض

وملزقين عليه ورقه كبيره وكاتبين عليها اسمه

ومربطين رجوله ويده

ومجهزينه للمشرحه

اغمى علي ساعتها

ولولا زوجي

كان ما عرفت يومها شاسوي

كان هو اللي يواسيني

وقعدت عالارض اندب حظي

وليش تزوجت وتركت ابوي

واصرخ في زوجي واقوله

انت السبب .. خذتني من ابوي

واخوي يواسيني ويقول اذكري الله



http://www.majaless.com/up/uploads/2b011d7f8d.jpg


رجعت البيت وكانت الساعه اربع الفجر

وفي الطريق قالي زوجي

انه كان مصصم نسهر عنده

لانه حس ان ابوي بيموت لان اطرافه كانت بارده

وعاتبته يومها لأنه ما نبهني علشان ما اروح البيت

وابقى معاه مدة اطول ..

طرشت مسج لصديقاتي القريبات من قلبي

منهم من كان عندي خلال نص ساعه

ما انسى وقفتهم معاي في هالمحنه

الساعه ثمان الصبح البيت انترس

وجابوا ابوي البيت تشوفه امي قبل ما يدفنونه

ركضت ابي اشوفه منعني زوجي وخاف اني انهار

ماصارت ساعتين الا رجع اخوي

وقلت له .. دفنته وتركته بروحه ؟؟

كنت مثل المينونه ..

وكل ما احد يدخل يعزيني

احسهم كانوا جايين يباركون زواجي وتغيرت المناسبه

لاني كنت عروس وما زالت الحنه بيدي

ونقوشها ترسم رجولي


http://www.majaless.com/up/uploads/aa46acfc21.jpg


راح ابوي وترك في خاطري ذكرى ..

ترك في خاطري حزن ..

ترك في خاطري شوق ..

اقعد واتذكر اشلون كان يلاعب عيال اختي واخوي

واشلون كان يغربلهم ويمللهم وما يرضى عليهم

وتمنيته يكون موجود ويلاعب راشد

تمنيت ادخل عليه بولدي

واقوله بوس راس جدك

تمنيت لين ازعل من زوجي اروح واشتكي له

محد كان يسمعني ويفهمني غيره

الام دايما شديده وصارمه

لكن ابوي كان رمز للحنان والتفاهم والعطف

الله يرحمك يايبه

احس عندي كلام كثير اقوله

لكن الحبر بيخلص وحبي لك ما بيخلص ..

في نهاية قصتي ..

دعواتكم لأبوي بالرحمه

واني اجيب اخ لأبني راشد اسميه على اسم المرحوم ...

( تمت )

::

::

لكم ارق تحيه

واشكر كل من تابع معي ذكرياتي

مع حبيبي الراحل .. رحمه الله ..

الشقردي
26-06-2007, 08:14 PM
الله يرحمه

ويسكنه فسيح جناته

ويجعله مع الابرار في عليين

احساس الدوحة
26-06-2007, 11:34 PM
اخي الشقردي

اللهم امين

اللهم امين

اللهم امين

تسلم على تواصلك يالغلا

دروب الحزن
27-06-2007, 02:14 PM
آآآآآه الله يرحمه برحمته ويسكنه فسيح جناته وجعل الفردوس الاعلى مقره ومقامه << تصيـح ..

والله قصتـج أثرت فينـي وايــد يمكن لنها حقيقيـه ..

الله يرزقج بذريه الصالحه وتسمينه ع المرحومـ ..

وترى أبوجـ مامات يكفى أنـه بقلبج وبقلبـ أهلجـ ..

احساس الدوحة
27-06-2007, 02:16 PM
اختي دروب الحزن

عمري ما راح احس ان ابوي مات

لاني اتذكره في كل ثانيه

تسلمين عالمرور والتعليق يالغاليه

الرجل الذي كويس
29-06-2007, 06:58 AM
الله يرحم أموات المسلمين

بس تستاهلين الطق يالملقوفه .

أجل مسيحية ..

مرهفة إحساس
29-06-2007, 07:19 AM
ياااه يااحساس
عشت كل لحظه من حديثك
منذ ان عرفتك وكنتِ دائمة الحديث عنه
والدك
........كان يعجبني وفائك له
رحمه الله و أسكنه فسيح جناته.
اللهم اغسله بالماء و الثلج
و البرد و بدل سيئاته حسنات.
\\
تعلمين احساس
شعرت بكل ماذكرتيه .........فقد
كان لي ايضا حبيبُ راحل ...........هو ابي الاخر
جدي رحمه الله ........رحل وكان عمري وقتها 10 سنوات
رحل امام عيني ومازالت نظرته الاخيره اتذكرها دوما
رحل وليته يعلم إن رحيله أفقد الحياة معناها ..
جمالها ولذتها
رحمه الله
\\
احساس
اعلم ان لا كلمة سأقولها ستخفف اللحظة حزنك
اعلمي فقط اننا هنا جميعنا معك، نقاسمك الدمع و الوجع يا احساس
وكل شيء آيل إلى انتهاء ..كل شيء
\\
دمتي بحفظ الله عزيزتي
\\
مرهفه

احساس الدوحة
29-06-2007, 01:49 PM
اخوي الرجل الذي كويس

صج ملقوفه واستاهل

بس لا تنسى كنت طفله

تشرفت بمرورك

احساس الدوحة
29-06-2007, 01:50 PM
اختي مرهفة احساس

رحم الله جدك وموتانا

وتسلمين على كلماتك

وتشرفت بتواجدك في ذكرياتي

الوعــ نور ـــد
29-06-2007, 04:03 PM
الله يرحمه برحمته ويسكنه فسيح جناته وجعل الفردوس الاعلى مقره ومقامه ..

قصتج واقعيه وحزينه يالغاليه ..

وبي يخليج لهلج ولولدج وبيتج ..

بس للحين من اذكر سالفة المسيحيه اطيح على بطني من الضحك ..

احساس الدوحة
29-06-2007, 11:15 PM
اختي نور الوعد

المسيحيه حتى اهل يعايروني بهالسالفه

بس كنت صغيره ههههه

تسلمين عالمرور يالغاليه

malake
23-07-2007, 11:05 AM
حبيبتي في الله
موضوعج اكثر من روعة
و طريقتج في الكتابة
الله يحفظج
و يرحمنا برحمته
و يرحم امواتنا
الله يرحم ابوج و يسكنه في فسيح جناته
اميــــــــــــــــــــــــــــــــن
اختج في الله

ملاكــــــــــــــــــي

احساس الدوحة
23-07-2007, 05:01 PM
اختي ملاكي

تسلمين عالمرور

وربي يرحم موتانا وموتاكم

لك مني ارق تحيه يالغلا

malake
24-07-2007, 10:09 AM
اشكرج يا الغالية
الله يحفظج يا رب
اختج في الله

ملاكــــــــــــــي

أماني العاشق
24-07-2007, 01:53 PM
اختي احساس الدوحه
ذكرياتك جميله برغم حزنها النهائي
ولكن اختي لقد رحل والدك رحمه الله وادخله فسيح جنانه امين يا رب وترك لنا وردة تعطرنا باريج عطرها
كل التقدير لك

احساس الدوحة
24-07-2007, 05:18 PM
اختي ملاكي

تسلمين يالغاليه عالمرور

ولك مني ارق تحيه

احساس الدوحة
24-07-2007, 05:18 PM
اخي اماني العاشق

كلنا لها وراح نروح

ولكن الذكرى تبقى

لك ارق تحيه يالغلا

دموع ساخنه
01-12-2008, 12:47 AM
اختي احساااس والله بكيت يوم سمعت قصت وفاه ابوج الله يرحمه ويسكنه فسيح جناته

احساس الدوحة
01-12-2008, 06:54 AM
اختي ام حمودي

تسلمين يالغاليه على هالمشاعر

وربي يخلي لج احبابج يارب

حنونـــــــه
01-12-2008, 07:05 AM
الغالية احساس كانت دموعي الكفيلة بالرد على حروفك

لاتعليـــــــــــــق غير الله يرحمه ويسكنه فاسح جنانه

وشجعتيني أكتب عن أبي رحمه الله إنتظروني

لأنهم يستحقون أكثر من أن نذكرهم بالخير

احساس الدوحة
01-12-2008, 04:50 PM
اختي حنونه

الله يرحم والدك

ويسكنه فسيح جناته

تسلمين عالمرور اختي الكريمه

وجه السعد
02-12-2008, 02:28 PM
الله يرحمه ويغمد روحه الجنه ويرحم جميع موتى المسلمين

يعطيج العافيه احساس على عوار القلب

احساس الدوحة
02-12-2008, 08:02 PM
اخوي وجه السعد

ماعاش من يعور قلبك

تقبل تحياتي

دار القصه
24-12-2008, 12:22 PM
اختي احساس الله يرحم والدك

و يدخله فسيح جناته

والله يصبرك وجزيك خيرا على رعايتك له ..

احساس الدوحة
24-12-2008, 01:24 PM
اخي دار القصه

ويرحم ربي موتاكم ان شاء الله

تسلم عالمرور العطر

ريووومه
24-12-2008, 06:05 PM
الله يرحمة ويرحم موتى المسلمين
والله قطعتي قلبي بقصتج
:asd:

احساس الدوحة
25-12-2008, 11:11 AM
اختي ريومه

سلامة قلبج يالغاليه

تقبلي تحياتي

الريــم
22-04-2009, 11:26 AM
أختي إحساس ياقلبي عليك ياالغالية

رحم الله والدك كان رمز التفاهم والحنان فعلا" :a87:

وأحس فيه صفات مشتركة بينه وبين والدي رحمه الله

وبالنسبة لسالفة المضيفة والدي نفس الشي له مواقف :sweatingbullets:

ونسمي الشخص اللي مثل والدي ووالدك هواوي

أو على قولة بعض الناس قلبه خضر :oops:

احساس الدوحة
23-04-2009, 09:55 AM
الريـــم

الله يرحمهــم

قلوبهــم خضــره

تحياتـــي

محمد الخالدي
23-04-2009, 02:27 PM
ربي يجزيه كل خير

والله يرحمه ويغفر له ويسكنه فسيح جناته

:


الذكريات جميله بحلوها ومرها

جميل ما سطرتيه من مسلسل لحياتج

وان شاء الله القادم احلى واحلى

احساس الدوحة
23-04-2009, 08:29 PM
محمــد الخالــدي

سعيــده بتشريفــك ذكرياتــي

عســاك عالقــوه غــلاي