المساعد الشخصي الرقمي

مشاهدة النسخة كاملة : وينـك يـا عيسـى ؟؟


احساس الدوحة
02-09-2007, 03:00 PM
http://www.majaless.com/up/uploads/1cad06e59e.jpg

الجو بارد .. والسما تمطّر ..

وانا حاطه الكرسي قدام الشباك

واشوف منظر المطر وهو ينزل

واتخيل حفيدي عيسى يحوم حولي

ويقول .. يدتي بردان

اخذه بحضني واغطيه بشالي

واول ما اضمه ينام فديته على صدري

ملامحه تشبه ملامح ابوه

فديت عيسى وابوه والله ..

سرحت اتذكر ..

عرس ولدي فهد..

اذكر يومها طلبت من زوجي يساعد ولدي في مصاريف عرسه

وقلت له ولدنا وراه مهر وعرس وتجهيز شقه وشهر عسل

ما انسى رده يوم قال .. ما عندي فلوس

مع اني متأكدة ان عنده مبلغ في البنك مب بسيط


بعت اغلى ما عندي علشان عرس ولدي يطلع ملكي

بعت طقمي الالماس اللي عطاني اياه زوجي

في صباحيتي ..

بس علشان ولدي ما ينحرج عند نسايبه

والناس تقول عرسنا راقي ..

http://www.majaless.com/up/uploads/1cad06e59e.jpg

تزوج ولدي فهد وسافر شهر العسل

لأول مره يفارقني ولدي وكان صعب علي

اني اعيش وحيده بعد ما كان يونسني في وحدتي

بس قلت اهم شي سعادة ولدي واستقراره

بعد عرس فهد بشهرين توفى زوجي

وخلاني وحيده بهالبيت ..

كنت كل يوم اقعد انتظر ولدي يدخل يزورني

او جرس التليفون يرن ويكون ولدي

انشغل مع عروسته وبيته

وانا بقيت وحيده بهالبيت

ما خبرني ان زوجته حامل الا وهي في الشهر الخامس

مع ان الناس كلها درت الا انا

الناس كلها تبارك لهم وانا مادري

زعلت يومها وايد وقلت له

امك اول الناس لازم تبشرها

رد وقال .. نسيت ...

http://www.majaless.com/up/uploads/1cad06e59e.jpg

كان يزورني في الشهر مره

واحيانا في الشهرين مره

كنت دايما متلهفه على سماع صوته وشوفته

ويوم يزورني انسى اعاتبه من فرحتي بجيته

يوم ولدت زوجته بشرني وقالي يمه ابشرج

مرتي جابت لي عيسى ..

فرحت فرحة كبيره

اول مره اصير جده وعندي حفيد

بعد ولادتها بشهرين استغربت ان فهد تغير

قام يزورني كل يوم و يجيب لي اغراض البيت

ويتصل لو ماقدر يزورني

وانا اقول معقوله عيسى سبب في تغيير طبع ابوه ؟؟

بعدها باسابيع عرفت السبب ..

زوجته تبيني اكون مربيه لعيسى لان دوامها قرب

وافقت وانا فرحانه لان عندي من يشغلني

ويونسني في وحدتي

كانت كل يوم الصبح تجيبه والظهر تاخذه

ولو كان نايم اتصل لها واقولها لا تمرين تاخذينه

ترى عيسى نايم ..

كان شمعة بيتي

ونور عيوني .. ورفيج يومي ..

http://www.majaless.com/up/uploads/1cad06e59e.jpg

تمر الايام وتجيب لها خدامه ..

وانقطعت زياراتهم ولا قمت اشوف فهد ولا عيسى

ورجع مثل الاول يزورني كل شهرين مره

آه يا زمن .. يوم كانت لكم حاجة كنتوا تزوروني ..

وبعد فترة هربت الخدامه من البيت

واضطروا يجيبون لي عيسى

وانا فرحانه برجعته لحضني

لان مافي اعز من الولد الا ولد الولد

وكل ما كبر عيسى كل ما تعلق قلبي فيه اكثر

قام هو يقولهم ابي جدتي خذوني عندها

وكانوا يجيبونه لي بس لو عندهم مشوار او معزومين

كانت حلقة الوصل بيني وبينهم عيسى

ما حسيت في يوم ولدي زارني علشاني

او علشان يشوف حاجتي

كان همه يتطمن ان عيسى مرتاح عندي

http://www.majaless.com/up/uploads/1cad06e59e.jpg

بعد فترة رجع وتغير ولدي وقعد يتقرب مني

عرفت ان له حاجه في نفسه ..

وفعلا كان طمعان في بيع البيت لانه محتاج فلوس

قلت له وانا وين اروح يا فهد

قالي تعالي واسكني عندي

قلت له ولكن انت بيتك عباره عن شقه وين اقعد

قالي غرفه الخدامه باجددها واقعدي فيها

قلت والخدامه وين تنام .. قالي .. معاج

رفضت وقلت انا احب الهدوء والاستقرار

وطول عمري معززه مكرمة في بيتي

زعل وقال لو ما وافقتي على بيعة البيت

راح اشتكي في المحكمه ..

هذا ورث ابوي ومن حقي ..

شفتوا اشلون الفلوس تعمي القلوب

يبي يشتكي على امه علشان الورث ..


http://www.majaless.com/up/uploads/1cad06e59e.jpg


قبلت يبيع البيت وياخذ سهمه

وانا اجرت لي شقه صغيره على قدي

واثثتها بالورث اللي حصلته

واستقريت فيها وكنت ادفع الايجار من راتب التقاعد

وانا في وحدتي في الشقه ارتفع عندي الضغط

وصادتني جلطه في القلب ولا كان في احد معاي غير الخدامه

اتصلت بالاسعاف واخذوني عالمستشفى

بطلت عيوني ادور فهد

اسأل الخدامه كلمتيه ؟؟ تقول ايوه يا ماما

رقدت في المستشفى اسبوع ولا زارني فهد

ولا جاب لي عيسى اشوفه .. وحشني ..

http://www.majaless.com/up/uploads/1cad06e59e.jpg

اضطروا بعد ما شافوا علاجي بيطول

ولا احد سأل عني

انهم يحولون على دار العجزه

اشتقت لعيسى .. واشتقت اضمه لصدري

ولكن لا فهد جاني ولا جاب لي ولده عيسى

وانا سرحانه افكر

في ولدي اللي هجرني

صحيت على يد الممرضه وهي تقول:

يا ماما جيبي المخده هذا مو عيسى

وروحي على السرير علشان تنامين

وقت النوم يا ماما ..

( انتهى )

::

::

20/8/2007 م

احساس الدوحة

الشقردي
02-09-2007, 03:26 PM
الله على الدنيا

قصة مؤثرة ومبيكة اختي احساس


الله يهدي كل ابن عاق

ام الزري
02-09-2007, 03:38 PM
http://www.majaless.com/up/uploads/ef06038b8f.gif (http://www.majaless.com/up)

احساس الدوحة
02-09-2007, 05:50 PM
اخوي الشقردي

الله يهدي الجميع

تسلم عالمرور العطر يالغلا

احساس الدوحة
02-09-2007, 05:51 PM
مراحب اختي ام الزري

تسلمين عالمرور يالغاليه

أمواج
05-09-2007, 03:40 PM
قصه مبكيه أختي احساس وهذي حقيقه نلمسها في مجتمعنا العربي المسلم أصبحت الدنيا هي همهم ..

DaRla
06-09-2007, 02:50 AM
صغتي الواقع الاليم الي نعيشه في اسطر محزنه ومؤثره =(


تسلمين خيتــوو ...

احساس الدوحة
06-09-2007, 09:15 AM
اختي امواج

الله يكون بعونهم

قاعدين في العجزه

ينتظرون طله عيالهم

لك ارق تحيه يالغلا

احساس الدوحة
06-09-2007, 09:16 AM
اختي دارلا

ربي يهدي الجميع

تسلمين يالغلا