المساعد الشخصي الرقمي

مشاهدة النسخة كاملة : قصتــي مــع الحــج ..


احساس الدوحة
18-02-2008, 02:17 PM
http://www.majaless.com/up/uploads/d3c44b97c9.jpg


ما اقدر اوصف فرحتي يوم نوى ولد اختي يروح الحج

قلت في نفسي فرصه اتعلق فيه واروح معاه واحج

قبل الحج باسبوعين قالوا لنا لازم تطعيم الحج

رحنا انا وهو الى مركز التطعيم

وللأسف ما قلت لهم اني مريضة ربو

وعطوني ابرتين خلتني امرض

سخونه وازمة ربو وترجيع

ومع المغذي والعلاج الحمدلله

خفت السخونه

وبقت ازمة الربو ..

نصحني زوجي اني الغي الرحله

واسافر معاه السنه اللي بعدها

لكني اصريت لاني كنت مجهزه كل شي

عاندته ووعدت نفسي اني اتحمل كل شي

في سبيل اني احج واشوف الكعبه ..

( وخاصه انها اول رحله لي لمكه )

http://www.majaless.com/up/uploads/32a90cebfa.gif

وانا اودع راشد ولدي

قالي ..

- ماما وين بتروحين ؟

- قلت له .. باروح بيت الله

- ليش ؟؟

- اصلي وادعي انه يعطينا نونو جديد

- وبتجيبين لي لعبه مصارعين ؟

- ولا يهمك حبيبي ,,


http://www.majaless.com/up/uploads/7f0b681edf.gif

في الطياره زادت ازمة الربو

والكحه ما فارقتني

طبيبة الحملة تعرفت علي من الطياره

وسألتني عن الادويه اللي جايبتها معاي

وعرضت علي اول ما نوصل للفندق في مكه

اروح لها وتعطيني جرعة من البخاخ

ومن هنا ادعو لها بالتوفيق وربي يسعدها

ما قصرت معاي طول الرحله

ولين اليوم تتصل وتتطمن علي ,,

http://www.majaless.com/up/uploads/872e1b55ff.gif

وصلنا فندق مكه تقريبا الفجر

وتم الاتفاق مع راعي الحمله

ان نخرج للعمره الساعه التاسعة صباحا

نصحتني الطبيبه بعد ما اخذت جرعه الفنتولين

ان اطوف على كرسي متحرك

علشان ما ارهق نفسي ..

http://www.majaless.com/up/uploads/a702cf8e18.gif

وصلنا للحرم

ركضوا المطوفين يتنافسون من يسبق الثاني

وخاصه يوم شافوني بالكمام على وجهي

التموا حولي ..

اخترت احلى واحد .. سعودي .. شكله مريح .. :crazy:

كنت متلهفه لرؤيه الكعبه

قالوا لي بتبكين وبتحسين بشعور غريب

قاعده عالكرسي وانتظر متى اشوف هالزحمه

اللي نشوفها بالتلفزيون

واخذني المطوف في ممر طويل

مليان بالافريقيات مع عيالهم

وهي عصابه مافيا معروفه

مقطعه ايادي الاطفال للتسول

التموا علي ولا عرفت اشلون اطلع من وسطهم

ما وعيت الا اللي يدزني واحد افريقي عمره 10 سنوات

قلت له ..

- من انت ؟؟

- انا عاطف

وانا اللي باخذك للحرم

- ووين صاحبك السعودي ؟؟

- انا بطوف الناس من خمس سنوات

لا تخافي انا باطوف فيكِ..

وما وعيت الا وانا فوق لان الحرم زحمه

طول الطواف وانا التف واشوفه

واتطمن عليه وحاسة بالذنب

كاسر خاطري

احس بركبته في ظهري عند المنحنيات مسكين

كان ودي اقوله قوم واقعد مكاني وانا اطوف فيك

ويوم وصل دور الصفا والمروه

طاف فيني وعند الشوط السادس

وقف الكرسي ....

لفيت ..

الا عاطف طايح عالارض !!!

- شفيك يا عاطف ؟

- رجووووووولي

- ايش فيها ؟؟

- ضربت في العجله ..

والتموا الناس وصارت حشره

مفتكرين انه مغمى عليه

( عاد شوفوا الاحراج اللي انا فيه يومها )

خلص من الطواف

ورجعني للمر اللي فيه الافارقه

وهو مكان التجمع لانتظار باصات الحملات

وطبعا جاني السعودي واخذ مني الفلوس

عالجاهز ..

كانت الساعة تقريبا العاشره والنصف صباحا

وقعدت انتظر الباص وبقية زملائي

لين ما خلصوا صلاة الظهر في الحرم

الناس تصلي في الحرم وانا في الممر فرشت اصلي :em22:

ورجعت الفندق وانا ابكي

تعبانه + عاطف المسكين = عدم استمتاع بالعمره


http://www.majaless.com/up/uploads/d65829f79d.gif

رحلة مِنى كانت تعيسه

حملتنا من اللي انظلموا السنه هاذي

انطفت علينا الكهربا واحنا في الخيام

لا ماي بارد نشربه ( الثلاجه تسكرت )

ولا شاي دافي ( السخان ما نقدر نستعمله )

ولا نور في الحمامات ( الله يعزكم )

ولا مكيف مع الزحمه ( وزادت ازمة الربو )

وطبعا رمي الجمرات وكلت ابن اختي عني

منعوني من الدخول في الزحمه :em22:

http://www.majaless.com/up/uploads/ceea488859.gif

ما انسى موقف الدكتوره

يوم قالت لي تعالي نامي في خيمة الملحق الطبي

بعيد عن الزحمه والحر

وعلشان ما تزيد عليج الازمه

الله يجزيها كل خير

http://www.majaless.com/up/uploads/b9dcfc741b.gif

في مِنى وعرفات

قررت الطبيبة اني ارجع الدوحه

وما اكمل للمدينة

نظرا لظروفي الصحيه

حاولت معاها بكل الطرق

ولكن مسؤول الحمله

رفض يتحمل مسؤوليتي

من مكه للمدينه لعدم وجود جهاز بخاخ

قررت اوقع على تعهد لاخلاء مسؤوليتهم

واني اروح المدينه على مسؤوليتي

ولكنهم رفضوا ..

طلبوا مني رقم زوجي في قطر

علشان يكلمونه ويقنعونه

بضروره رجوعي قطر

وعدم اكمال رحلتي للمدينة

ساعتها قلت بلا مشاكل وعوار راس

ووافقت اني ما اكمل وارجع قطر

http://www.majaless.com/up/uploads/d904217136.gif

طبعا شيخ الحمله قرر اني اجمع

طواف الافاضه مع طواف الوداع

نظرا لظروفي الصحيه ,,

يوم وصلنا الحرم لطواف الوداع

كانت الساعه 12 بالليل

اول ما وقف الباص عند الحرم

قعدت ادور على عاطف

وحشني :4s2j9s (21):

وللاسف ما لقيته

لان المنافسات كانت قويه يومها

خبركم اخر يوم والكل يتهاوش على الحجاج

اخترت هالمره واحد سعودي وشرطت عليه

انه هو اللي يطوف فيني وما يسلمني لاي احد

وافق واخذني فوق لان الحرم زحمه

وخلاني اشوف الكعبه و حسيت احساس ثاني هاليوم

فعلا دمعت عيني لاني باترك الحرم

ومنظر الكعبه اروع من رائع

ولكن ...

الجو كان باااارد وما تحملته

http://www.majaless.com/up/uploads/0ce35446af.gif

اول ما ركبت الباص قعدت اكح

لين ما وصلت الفندق

حسيت ان اللي قاعد قدامي في الباص

وده يعطيني كف على وجهي :bangin:

طبعا طبيبه الحمله اول ما نزلنا عند الفندق

قالت لي باقي من الوقت اربع ساعات

لين ما يتحرك الباص لجده للرجوع للدوحة

لازم تروحين عياده خاصه

علشان تقدرين تروحين جده

قعدت في العياده مع جلسة بخاخ

وكورتيزون عن طريق الوريد

خلصت الساعه خمس الصبح

على طول من العياده على باص جده

والحمدلله رجعت الدوحة وانا مكملة الحج

والمدينة ربي يعوضني في المرات الجايه

وتقر عيني بزياره المسجد النبوي

http://www.majaless.com/up/uploads/56f9a4ced3.bmp

في مطار الدوحة

ما نسيت المصارعين حق راشد

وشريته من السوق الحره

استقبلني راشد بابتسامه عريضه

وعطيته المصارعين

طالعني وقال ..

ماما وين النونو ؟؟؟

- ضحكت وقلت ,,

انا قلت حق الله يعطيني وربك كريم ..

http://www.majaless.com/up/uploads/d108e50b2e.gif

( تمت )

الحزين
18-02-2008, 02:32 PM
والله قصه حلوه تصلح اسويها فلم وثائقي بس عاد اقدر الحق على المهرجان علشان اخذ فيه احسن فلم بل مهراااجان ههههههههه
الف مبروووك على الحجه وانشاااله مقبوووله ويااااااااارب يااااااااااارب ياااااارب يفرحج بنونووو حلو ويطلع عليه . لانه كاسر خاطري رشوووووود

ام الزري
18-02-2008, 02:37 PM
استمعت بالقراءة وتذكرت يوم رحت الحج واحلى شي في الحج طواف الافاضة والجو كان بارد ..
وحج مبرور وذنب مغفور ان شاء الله والله يرزقك بحجة ثانية وزيارة المدنية المنورة ان شاء الله ..

احساس الدوحة
18-02-2008, 03:59 PM
اخوي الحزين

خلاص شارك السنه الجايه في المهرجان

بفيلم عن قصتي مع عاطف هههه

والله يسمع منك يارب

واجيب ولد نفس راشد

تسلم لي عالمرور يالغلا

احساس الدوحة
18-02-2008, 04:00 PM
اختي ام الزري

اللهم امين

تسلمين عالدعوه الحلوه يالغاليه

الشقردي
18-02-2008, 04:04 PM
حج مبرور بإذن الرحمن

والله يرزقج بنونو ولد

احساس الدوحة
18-02-2008, 04:05 PM
اخوي الشقردي

اللهم اميــــــــن

تسلم عالمرور يالغالي

..الجوري..
18-02-2008, 06:02 PM
سلااااامتج يالغلاا ..

فدديت رشوود والله ^^ ..

مسكين عاطف ..!!

شكلج تعذبتي وايد ..!!

حج مبرور بأذن الله

شقره بنت كحيلان
18-02-2008, 07:58 PM
حج مبرور وذنب مغفور وان شاءالله والله يبلغج زيارة المدينه ان شاءالله ,,
اشكرج على القصه استمتعت بقرائتها ,,
تسلمين اختي احساس ....!!

أمواج
18-02-2008, 08:17 PM
استمتعت بقرآءة القصه

ذكرتيني بالافارقه اللي هناك صج يوم كنت أشوف فارشين الارض والعيال ولا البنات متسدحين

ويشحتون فيهم ..

يعطيج العافيه أختي على القصه

وحج مبرور باذن الله وربي يرزقج بحجه ثانيه وتزورين المسجد النبوي

احساس الدوحة
18-02-2008, 08:19 PM
اختي الجوري

فعلا كانت رحلتي متعبه

وما حسيت اني حجيت

وان شاء الله ربي يقدرني واكررها

تسلمين يالغاليه

احساس الدوحة
18-02-2008, 08:20 PM
اختي شقره

الله يسمع منج يارب

تسلمين يالغاليه عالتواصل العطر

احساس الدوحة
18-02-2008, 08:21 PM
اختي امواج

اللهم امين

واشكرج عالمرور يالغاليه

what ever
18-02-2008, 08:33 PM
ذكرتيني بالحج ..
بصراحه استانسنا وايد ..
مع اني مرضت قبل مانروح المدينه ..
وهناك طوول الوقت تميت في الفندق ..

شكلج تعذبتي وايد هناك ..
بس انشالله كله اجر وعافيه ..

دار القصه
18-02-2008, 08:44 PM
حج مبرور وذنب مغفور ان شاء الله

قصتك محزنه وخوفتيني من الربو ما عندي ربو بس حساسيه في الانف...

والله يوفقك ويرزقك بالذريه الصالحه كثير من النساء اختي يـتأخروا في الحمل بعد المولود الاول

ويقعدوا اقل شي خمس سنوات الى ثمان سنوات بعدها تحمل ..

اعرف كثير نفس الطريقه بالرغم ان المرض يكون مختلف احيان التهاب واحيان هرمون الحليب

والخلل الحقيقي تنظيف الانابيب ...

الله يرزقك اختي

خوخة لذيذة
18-02-2008, 10:29 PM
يااااااااااااهـ

شي عجيـب سـبحان الله ..

الله ياجرك في كل عمل قمتي فيه ..

و الله يرزقك روحه ان شاء الله للمدينه النبويه ..

و الله يخلي لك رشود و يحفظه ان اشاء الله و رزقه اخو او اخت صغنونين

شكراً لك ..

لا حرمنا قصصك ..

:)

احساس الدوحة
19-02-2008, 01:53 PM
اختي عافيك الخاطر

تسلمين يالغاليه

ولك ارق تحيه

احساس الدوحة
19-02-2008, 01:54 PM
اخوي دار القصه

ربك كريم

وان شاء الله يزرقني بالنونو

تسلم عالمرور والتعليق

احساس الدوحة
19-02-2008, 01:56 PM
اختي خوخة لذيذة

ربي يسمع منج ان شاء الله

تسلمين عالدعوة الطيبة

زهرةالصبار
19-02-2008, 02:03 PM
بصراحة حالتك حزنتني لأنها اول حجة وأول زيارة لمكة

بس اكيد إن حالتك الصحية كانت أصلا غير مستقرة

وبصراحة هذي مخاطرة منك إنك تحجين وقت مرورك بالأزمة

لأن معروف عندنا إنه كل موسم حج تنتشر امراض الجهاز التنفسي

بكامل جده ومكه حتى لغير الحجاج سنويا نعاني من انتشار فيروسات الحج

وبعد كذا لازم يكون معاك الفنتولين بالشنطة على طول

وبخاخ الكورتيزون كعلاج وقائي يستعمل قبل موسم الحج بشهرين ثلاثة

الله يشفيك ويعافيك

أنا كل عيالي تقريبا عندهم ربو فعندي خبرة كبيره باعراضه وعلاجه

اعذريني عالإطاله

احساس الدوحة
20-02-2008, 11:24 AM
اختي زهره الصبار

ربي يشفي عيالج ان شاء الله

وانا عن نفسي

سافرت وانا اصلا تعبانه

والجو هناك زود الازمه

تسلمين عالمرور والتعليق

ليتك معي!!!
20-02-2008, 01:11 PM
حج مبرور وذنب مغفور ان شاء الله

والله يتقبل منج ومنا صالح الاعمال ان شاء الله

والله يرزقج على قد نيتج اختي احساس الدوحه

تويكس
20-02-2008, 01:38 PM
خخخخخ

لو شفتي عاطف سلمي لي عليه

حج مبرور وسعي مشكور

بومحمد
20-02-2008, 03:04 PM
حجاً مبرور وذنباً مغفور انشاء الله كله اجر وعافيه حتى الصبر اللي صبرتي على مرضج الله يؤجرج عليه وماتشوفين شر انشاء الله الله يعطيج العافيه

احساس الدوحة
21-02-2008, 11:58 AM
اخوي ليتك معي

تسلم لي والله

وعساك عالقوه

احساس الدوحة
21-02-2008, 11:59 AM
اختي تويكس

اتمنى الاقيه

بابوسه بعد ههه

تسلمين يالغلا

احساس الدوحة
21-02-2008, 12:00 PM
اخوي بو محمد

الله يعافيك يالغلا

الطواش
23-02-2008, 03:28 PM
حج مبروور وذنب مغفووور ان شااااء الله

والله قصتج ولا في الأفلام

عجبتني وااايد

وخصووصا عاطف اللي كسر خاطري

واهم شي انج رجعتي بالسلامة

ووصلتي المصاارعين حق رشوودي

احساس الدوحة
23-02-2008, 04:17 PM
اخوي الطواش

والله لو ما جبت المصارعين

بيرجعني الحج مره ثانيه

تسلم لي عالمرور يالغالي